قصة الخديعة كاملة

= ايه دة بجد ينفع تعمل كدة، متأكد مش هنتكشف..

- مانا بقولك كل حاجة وليها تمن..

= انا موافقة ولما الموضوع يتم هبقى اديلك فلوس ساعتها..

- بصراحة ماضمنكيش واللي اوله شرط اخره نور، قبل ماعمل اي حاجة تكتبيلي نص البيت باسمي..

= انت اتجننت لا طبعا دة كتير اوي

- كتير ايه، هو انتي مش عارفة الفلوس اللي في البنك كام، على العموم فكري وردي عليا بكرة الصبح، سلام.

ماقدرتش استنى لغاية بكرة الصبح عشان ابلغه اني وافقت، كلمته في ساعتها وقولتله اني موافقة اصل بصراحة مبلغ من 6 ارقام يضيع اي حيرة..

كنت قلقانة وفرحانة في نفس الوقت، صحيت الصبح بدري ونزلت اشتريت لبس جديد على حبة اكسسوارات على حبة مكياجات قولت يمكن لما يشوفني حلوة ومثيرة يحن ليّ تاني، جهزت ووضبت نفسي على الاخر والساعة سابعة بالظبط كنت بخبط على مكتب المحامي.

الجزء التاني والاخير

وصلت مكتب المحامي الساعة سابعة بالظبط، كان كلهم موجودين ماعدا مصطفى، فضلنا مستنين فترة طويلة لغاية ماوصل، وطبعا داخل مبتسم ومش في باله اي حاجة ماهو اللي هيورث الفلوس كلها وتقريبا كان قاصد يتأخر عشان ي0ذل فينا شوية.

دخل قعد على كرسي في مقدمة القعدة وحط رجل على رجل وقال للمحامي بكل تناكة ياريت تبدء على طول عشان متأخر وعندي مواعيد مهمة..

... بدء المحامي يقرا الوصية لغاية الشرط بتاع انه يتجوزني ساعتها مصطفى ملامح وشه اتغيرت واتعصب جامد

و قام يشد الورقة من المحامي عشان يقرا الوصية بنفسه

و يتأكد من صحة الكلام دة..

انا طبعا اعصابي انهارت على الاخر كنت خايفة يكتشف التزوير اللي عملناه انا والمحامي فحاولت ابين ان انا كمان مضايقة ومتعصبة عشان اداري على توتري.

الموقف كان صعب اوي لدرجة ان مصطفى اول ما خلص قراية واتأكد من الكلام المكتوب ساب المكتب ومشى على طول من غير ماينطق ولا كلمة..

رَوَحت من عند المحامي وانا التفكير هيموتني معرفتش انام من كتر القلق والخوف، رد فعل مصطفى كان غامض..