اتقدملي أكتر من عريس

اتقدملي أكتر من عريس بعد ما نقلنا للمدينة وأنا كنت برفض وأهلي مش عارفين سبب الرفض أنا نفسي مكنتش عارفة برفض ليه! 
مع إني كبرت خلاص وكل اللي في نفس عمري بيتجوزوا عادي لكني كنت برفض.
أبويا وأمي مكانوش بيضغطوا عليا اخرهم كانوا بيحاولوا يقنعوني بإلحاح لكن أخويا الكبير هو اللي ضغط عليا وخنقني وكان هيموتني لإن الموضوع وصل عنده للشك. وقالي أول عريس هييجي يتقدم ويكون ابن ناس ومناسب هتتجوزيه وقد كان.
يوم جوازي طبعا مكانش يوم عادي اتجوزت في الشتا وفي اليوم دا بالذات المطر نزل وكان شديد لدرجة إننا لما وصلنا للأستوديو عشان صور الفرح معرفناش ننزل من المطر اللي غرق الشوارع بالطين.

كل حاجه اتلغت حتى قاعة الأفراح مرحتهاش كنت ببكي من جوايا عشان عايزه أفرح زي أي بنت لكن مكنتش ببين زعلي قدام جوزي عشان ميزعلش أكتر ماهو زعلان.
أول أسبوعين من الفرح كانوا عاديين خالص ومحصلش فيهم أي مواقف غريبة لكن في يوم وأنا قاعدة مستنيه جوزي حوالي الساعة 11 بالليل كنت بتفرج على التليفزيون بره على الكنبة وخلصت المسلسل وقررت أنام لحد ما جوزي يرجع يصحيني أحضرله العشا وقبل ما عنيا تغمض وأنام إلا وسمعت صوت شئ بيوقع في المطبخ وأطباق وكبايات بتتكسر وبمجرد ما قررت أقوم أشوف فيه إيه ويادب قعدت وخلاص هقف وفجأة حاجه اترمت عليا. زي ما يكون وقعت عليا حيطة بس مش شايفاها.
حسيت بحاجه مكتفة ومكلبشاه كدا وبقيت نايمة على الكنبة على ضهري وجسمي متثبت مش عارفه أحركه فيه شئ قاعد فوقي ودايس بإيده على خدي ودايس عليه بكل قوته مكنتش عارفه أبص كويس أشوف إيه الشئ دا لكن شوفت إيده كانت كلها شعر