الجزء الاول..في شقة اسكندريه الجديده.. حصريا على موقع ايام وصفحة روايات من عالم آخر بقلم محمد ابراهيم

_ يلا حضري نفسك علشان هنطلع اسكندرية بعد يومين .. وادي مفتاح الشقة اللي هنروحها .. كلمت محمد صاحبي اللي كان معايا في الشغل عنده شقة هناك هي بتاعت جده وكل سنة بيروحوا يصيفوا ويقعدوا فيها بس بقالها ٣ سنين محدش بيروحلها .. و لانه مسافر ولما قولتله مترددش وكلم اخوة علشان يجيبلي المفتاح .. وأهو خدته منه .

فضلنا نهزر وكنت فرحانة جدا حضرت الشنط وبالفعل يومين وكنا هناك منطقة في اسكندرية مشهورة جدا سامحوني مش هقول اسم المدينة .
يا سلام على اسكندرية وجمالها بلد غنية بالدفء والمشاعر اللي ڠضب عنك بتحس بيها لما رجلك تخطيها الهوا وروح البحر اللي بتهفهف علينا كانوا مخلييني في عالم تاني .
وصلنا العمارة ولما طلعنا الشقة لقيناها متربة جدا ووقتها بصيت لعامر پغضب فهم من نظرتي علشان كدا قالي وهو بيضحك 
_ أيوة عايزة ايه يعني .. شقة ومقفولة من سنين عايزاها تبقى عامله ازاي .. بقولك مسافر ومحدش من اهله بقى بييجي وكويس اني لقيت شقة في الجو ده .. دا انتي مچنونة حد ييجي اسكندرية في شهر ١٠ يا مفترية .
رديت عليه وقولتله 
_ طبعا انت مستني مني اني انضف الشقة اللي هنقعد فيها كام يوم .. يعني اليومين اللي عايزة اريح فيهم دماغي برضو الاقي تنضيف وزفت .
وقتها قرب عليا وباس ايدي وقالي 
_ ودي برضو حاجة تفوتني .. دا انا حتى ابقى قليل الذوق يعني .. حطي بس الشنط وهننزل نتغدا علشان مېت من الجوع ولما نيجي هنلاقي الدنيا تمام .. كلمت بنت بواب العمارة وهي هتتصرف .. بس عارفه .. لما كلمت البواب علشان أقولك على ىاللي هنعوزه وكدا وعرفته اني هقعد في الشقة دي كام يوم .. لقيته بدأ يحرك إيده .
كنت بفتح شنطة من الشنط ولقيت عامر بيسكت بصيتله وقولتله 
_ بيحرك إيده اللي هو ازاي .
جالي وبدأ يطلع الهدوم معايا وهو بيقولي 
_ ما انا أكتشفت إنه أخرس .. وقتها بنته الكبيرة قالتلي هو يقصد ايه .. وقالتلي كلام أهبل كدا .. بقولك ايه مافيش حاجة سيبك منهم .. هما أسبوع وهنمشي مش هنقعد هنا طول العمر يعني .. المهم ننجز بقى دا انا بقولك ھموت من الجوع .
عامر ابن حلال وبيحبني وانا كمان بحبه طيب وحنين وقلبه كبير بس عنده مشكلة كبيرة ويمكن دي اللي مخليه كل حاجة حلوة بيعملها ملهاش طعم .
المهم دخلت أوضة من ال٣ أوض بتوع الشقة وفتحت النور كان فيها ريحة غريبة الريحة اللي في الاوضة دي غير ريحة الشقة كلها رغم انها مفتوحة مكنتش مقفولة .
عامر دخل الحمام وانا حطيت الشنطة على سرير مترب زيه زي كل حاجة في الشقة وقفت قدام مرايا التسريحة مسكت منديل ومسحت الجزء العلوي من المرايا انعكاس وشي ظهر بس مش بوضوح كنت عايزه بس احط ميك اب .
في اللحظة دي سمعت صوت حركة مفاجأة جاي من جوة الحمام ملحقتش انادي على عامر لاني لقيته بيخرج من الحمام وهو عرقان وكان حاطط ايده ورا ضهره ضحكلي وهو بيقولي 
_ يلا يا منال .. لسه ملبستيش .
صوته كان شوية مهزوز مشي من قدامي وسمعت صوت باب الشقة بيتفتح دقايق وطلعتله بس لما خرجت برة الشقة ملقتوش لسه هنادي عليه لقيته نازل من فوق .
الشقة في الدور الأخير واللي فوق كان السطوح مسألتوش هو طلع ليه أو
بمعنى أصح هو مدانيش فرصة ومسك ايدي